As Festiletras son un dos festivais culturais máis veteranos de Galicia. Nacidas o 17 de maio de 1982, coincidindo coa celebración do Día das Letras Galegas, xurdiron na Aldea do Couto (Ponteceso) coa vontade de crear un espazo de encontro arredor da lingua, da literatura e da cultura galega. O que comezou como unha pequena iniciativa comunitaria centrada na artesanía tradicional, a música de raíz e a literatura converteuse, máis de catro décadas despois, nun referente do panorama cultural galego. Ano tras ano, as Festiletras medraron incorporando concertos, artes escénicas, exposicións, obradoiros, encontros literarios e propostas de creación contemporánea, mantendo sempre a cultura galega como eixo fundamental da súa programación.

Un festival único

As Festiletras demostran que a cultura de máximo nivel tamén pode nacer e consolidarse desde o rural. Durante tres días, a Aldea do Couto transfórmase nun espazo de creación, convivencia e participación onde artistas, escritoras, músicos e público comparten experiencias nun ambiente próximo e acolledor. A literatura ocupa un lugar central desde a súa primeira edición. Ao longo destes anos, figuras imprescindibles das letras galegas como Manuel María, Xosé Neira Vilas, Bernardino Graña, Uxío Novoneyra, Anisia Miranda ou Francisco del Riego, entre moitas outras, participaron nas Festiletras, convertendo o festival nun punto de encontro privilexiado entre creadoras e lectores.


Un proxecto feito pola comunidade

Un dos grandes valores das Festiletras é o seu profundo arraigamento social. O festival é posible grazas á implicación da veciñanza da Aldea do Couto, que desde hai máis de corenta anos participa de maneira voluntaria na súa organización, preparación e desenvolvemento. A comunidade achega tempo, coñecementos e recursos, e mesmo abre as portas das súas casas, pendellos e leiras para converter toda a aldea nun gran espazo cultural. Esta participación colectiva fai das Festiletras un proxecto compartido e un exemplo de cultura construída desde o territorio.

Cultura durante todo o ano

O compromiso das Festiletras vai máis alá da celebración do festival. Ao longo do ano organízanse actividades de promoción da lectura e da lingua galega nos centros educativos da comarca, achegando ao alumnado ás autoras e autores homenaxeados e fomentando o coñecemento da nosa literatura.

A Fundación Eduardo Pondal, entidade organizadora, desenvolve ademais diferentes iniciativas de conservación da memoria cultural e de dinamización do territorio. Entre elas destaca o Premio Bos e Xenerosos, que recoñece cada ano a persoas destacadas polo seu compromiso coa lingua e coa cultura galega. Ao longo da súa historia foron distinguidas figuras como Isaac Díaz Pardo, Xosé Neira Vilas, Francisco del Riego, Víctor F. Freixanes, Ángel Carracedo, Guadi Galego, Susana Seivane, Margarita Ledo, María Canosa ou Xabier Díaz, entre outras.

Máis de catro décadas de cultura compartida

Ao longo da súa historia, as Festiletras recibiron algunhas das figuras máis destacadas da música, da literatura e das artes escénicas galegas. Polo festival pasaron artistas e grupos como Milladoiro, Leilía, Carlos Núñez, Berrogüetto, Mercedes Peón, Guadi Galego, Xosé Manuel Budiño, Baiuca, Tanxugueiras, Caamaño & Ameixeiras, Mondra, Ortiga, Sés, Fillas de Cassandra, Rodrigo Cuevas, Luar na Lubre, Roi Casal, The Rapants, Depedro ou Che Sudaka, entre moitos outros. Tamén participaron escritoras e escritores como Manuel María, Xosé Neira Vilas, Bernardino Graña, Yolanda Castaño, Marilar Aleixandre, Dolores Vilavedra, María Canosa, Xosé Vizoso ou Víctor F. Freixanes, así como creadoras e creadores do ámbito da narración oral, o teatro, o humor e a ilustración, facendo das Festiletras un espazo aberto a todas as expresións da cultura.

Unha referencia da cultura galega

Hoxe, máis de corenta anos despois da súa primeira edición, as Festiletras continúan sendo un proxecto colectivo que une tradición e innovación, literatura e música, patrimonio e creación contemporánea. Un festival feito desde o rural e para toda Galicia, onde a lingua, a identidade e a cultura seguen ocupando un lugar central. As Festiletras son, por riba de todo, unha celebración da cultura galega construída coa implicación da súa comunidade e aberta a todas as persoas que desexan vivir unha experiencia cultural única nun dos recunchos máis singulares da Costa da Morte.